د شخصي دښمنۍ له امله شخړه کې پنځو کسانو ته مرګ ژوبله اوښتې

محمودراقي (پژواک، ١١ غويى ٩٥): چارواکي وايي چې په کاپيسا ولايت کې د دوو کليو ترمنځ د شخصي دښمنۍ له امله پنځو کسانو ته مرګ ژوبله اوښتې ده.

د کاپيسا امنيه قوماندان مل پاسوال عبدالکريم فايق د غويي په ١١مه پژواک خبري اژانس ته وويل چې دا پېښه د دويم کوهستان ولسوالۍ د جمال اغې په سيمه کې رامنځته شوې ده.

هغه زياته کړه چې په دې سيمه کې د زړې شخصي دښمنۍ له امله پرون ناوخته د دوو کليو تر منځ وسله والو نښته شوې وه.

دى وايي چې په دې نښته کې د يوې ډلې يو تن وژل شوى او دوه نور ژوبل او له بلې ډلې هم دوه تنه ټپيان دي.

د فايق په وينا، سيمې ته پوليس رسېدلي دي او له پېښې سره د تړاو په تور يې شپږ کسان نيولي دي.

د کاپيسا د مرکزي روغتون ډاکټر اغا شېرين وايي، د دوی روغتون ته څلور تنه ټپيان وړل شوې چې يو ټپي په روغتون کې ساه ورکړه او د نورو روغتيايي وضعيت هم د اندېښنې وړ دی.

د سيمې اوسېدونکي محمداغا پژواک ته وويل چې دا نښته د څو ساعتونو لپاره روانه وه او دواړو لورو پر يو بل د سپکو او درنو وسلو ډزې کولې.

هغه له حکومت څخه وغوښتل چې په سيمه کې د غير مسوولو وسله والو د بې وسلې کولو په اړه اقدامات وکړي.