مشرانو جرګې د ايسا ادارې په اړه د ولسمشر پر پرېکړې د بياغور غوښتنه کړې

کابل (پژواک ٢٤ ورى ٩٥): مشرانو جرګې له ولسمشر وغوښتل، څو د سوداګرۍ او صنايعو په وزارت کې د افغانستان له پانګونې څخه د ملاتړ ادارې (ايسا) د ادغام په اړه له سره غور وکړي.

د مشرانو جرګې يوه غړي محمد علم ايزديار د يادې جرګې په ناسته کې وويل: "د ايسا ادارې لغوه کول د حکومت له لوري يو سليقه يي چلند و او هيله مند يو چې ولسمشر په هېواد کې د پانګونې د پراختيا لپاره کار وکړي، نه د يوې خپلواکې او فعالې ادارې د لغوه کولو لپاره."

هغه زياته کړه، چې د ايسا په اړه ولسمشر ته ناسمې مشورې ورکړل شوې او نوموړى بايد د خپل دغه تصميم په اړه له سره غور وکړي.

د ايزديار په وينا، د افغانستان له پانګونې څخه د ملاتړ نوې ادارې مشرتابه د يادې ادارې ډېرى ستونزې حل کړې او هېواد ته د پانګونې د راجلبولو په برخه کې هڅې کوي.

د يادې جرګې بل غړي صفي الله هاشمي وويل: "په داسې شرايطو کې د ايسا ادارې لغوه کول چې پانګه له هېواد څخه د ايستلو په حال کې ده او هيڅوک هم پانګونې ته چمتو نه دي؛ د افغانستان په ګټه نه ده."

هغه زياته کړه، د ايسا اداره له هغو ستونزو سره-سره چې په مشرتابه کې يې لرلې، تر اوسه پورې د پانګونې د راجلبولو او هڅولو په برخه کې داسې لاسته راوړنې درلودې، چې کومې بلې ادارې نه درلودې.

هاشمي زياته کړه: "د حکومت مشران بايد د خپلو کورنيو ستونزو له امله په هېواد کې د پانګونې په برخه کې خنډ ونه ګرځي."

د يادې جرګې لومړي مرستيال فرهاد سخي چې د جرګې رياست يې پر غاړه درلود، د افغانستان له پانګونې څخه د ملاتړ ادارو پر خپلواکۍ د ټينګار ترڅنګ وويل: "د يوې خپلواکې ادارې په توګه د ايسا پاتې کېدل، د هېواد د ټولو سوداګرو غوښتنه ده."

هغه زياته کړه، چې حکومت بايد په دې برخه کې ډېره پاملرنه وکړي او پرېږدې چې ياده اداره په خپلواکه توګه خپلې چارې ترسره کړي.

د فرهاد سخي په باور، پخوا چې په ياده اداره کې کومې ستونزې موجودې وې؛ اوس له منځه تللې او په دې وروستيو کې د پانګوالو ستونزې په ښه توګه حل کېدې.

ولسمشر تېره اونۍ د هېواد د اقتصادي عالي شورا په ناسته کې د سوداګرۍ او صنايعو په وزارت کې د ايسا ادارې له ادغام خبر ورکړ.

د ولسمشرۍ ماڼۍ مطبوعاتي دفتر ويلي، چې دغه کار له کومې سياسي انګېزې پرته، په ښه توګه سره د پانګونې جواز د صدور او په دې برخه کې د څو ادارو له شتون څخه د مخنيوي په موخه ترسره شوى دى.

د ايسا ادارې مشر محمد قربان حقجو هم د ولسمشر له دغې پرېکړې څخه د اندېښنې څرګندولو ترڅنګ ويلي، چې دغه کار به د هېواد پر اقتصاد او پانګونې ناوړه اغېز وکړي او پانګوالو ته په دې اړه منفي پيغام ورکوي.