کندهار کې ٧٠ سلنه ځمکه له ماينونو پاکه شوې

کندهار (پژواک، ١٧ ورى ٩٥): چارواکي وايي، په کندهار کې ٧٠ سلنه ځمکه له ماينونو پاکه شوې، خو لا هم ډېر کار او وخت ته اړتيا ده، چې د دې ولايت ګڼې سيمې له ماينونو پاکې او خلکو ته د ډاډمن ژوند شرايط برابر شي.

بل خوا ولايتي چارواکي پر وسله والو غږ کوي، چې لارو او ځمکو کې دې ماينونه نه ږدي او په دې توګه دې د انسانانو د ژوند خونديتوب ته پام وکړي.

دغه څرګندونې په هغې غونډه کې وشوې، چې د ولايت مقام د غونډو په تالار کې د مرستيال والي عبدالعلي شمسي په مشرۍ د ماين د خطر په اړه د عامه پوهاوي د نړيوالې ورځې په مناسبت جوړه شوې وه.

په دې غونډه کې د ماين پاکۍ اړوند د UNMACA ، ،DAFA HI،MCPA ،MDC ، SDA اوHT  موسسو استازو او ګڼ شمېر ماين پاکانو برخه اخيستې وه.

په سوېل کې د ملګرو ملتونو اړوند د ماين پاکۍ د عملياتو د مرکز سيمه ييز مشر عبدالسميع وويل، د ماين پاکۍ د بېلابېلو موسسو د پر له پسې زيار او کار په پايله کې په کندهار کې ٧٠ سلنه ځمکه له ماينونو پاکه شوې ده.

خو هغه زياته کړه، لا هم ډېر کار او وخت ته اړتيا ده چې ټوله ځمکه له ماينونو پاکه شي او د خلکو ژوند خوندي شي.

نوموړي ماينونه د خلکو د ژوند لپاره لوى ګواښ وګاڼه او ويې ويل، په دې ولايت کې د عامو وګړو ډېره مرګ ژوبله د ماينونو له امله ده.

هغه دا هم وويل چې په دې وروستيو کې د ماين پاکانو د ښې روزنې او تجهيز په پايله کې د کار پر مهال هغوى ته د ځاني زيان اوښتو کچه ټيټه شوې ده.

د کندهار مرستيال والي عبدالعلي شمسي هم وويل، ماينونه د خلکو د ژوند پر وړاندې لوى ګواښ دى.

هغه پر وسله والو مخالفينو غږ وکړ چې نور د ماينونو له ځاى پر ځاى کولو لاس واخلي او د خلکو ژوند ته پام وکړي.

شمسي ماين پاکان د ولس رښتيني خادمان وبلل او ويې ويل، هغوى پر ځان خطر مني، خو د خلکو ژوند ژغوري.

نوموړي د غونډې په بهير کې په کندهار کې د ماين پاکۍ د موسسو مسوولينو ته ستاينليکونه ورکړل او د هغوى هڅې يې وستايلې.

ده د ماين پاکۍ له موسسو وغوښتل چې خپل کارونه نور هم چټک کړي او د خلکو ژوند د ماينونو له ګواښ څخه وژغوري.

د يادونې ده چې د کندهار په ځينو سيمو کې نه يواځې د روسانو د تېري او جګړې د مهال ماينونه پاتې دي، بلکې وسله وال مخالفين هم په عامه لارو او ځمکو کې ماينونه خښوي، چې ډېر مهال په کې ملکي وګړو ته مرګ ژوبله اوړي.