فوټبال: د عُمان په وړاندي لوبي ته افغان لوبغاړو چمتوالی پیل کړ.

ليکنه: صابرحميدي

راتلونکې پنجشنبه ماخستن ۸:۳۰ بجې افغان فوټبال ملي لوبډله د عُمان فوټبال ملي لوبډلي سره لوبیږي، چي یادي لوبي ته افغان لوبډلي پرون دوشنبه عُمان ته سفر وکړ او هلته ئې د ښه چمتوالي په موخه خپل تمرینونه پیل کړل.

د عُمان او افغان فوټبال ملي لوبډلو ترمنځ دا لوبه د عُمان هیواد په کوربتوب د دې هیواد په مسقط ښار په السیب فوټبال لوبغالي کي ترسره کیږي.

دا لوبه د ۲۰۲۲م کال د فوټبال نړیوال جام او د ۲۰۲۳م کال د آسیا د ملتونو جام ته د لاري پیداکولو په موخه ترسره کیږي، چي په دې سیالیو کي دا د افغانستان درېیمه لوبه ده.

افغان لوبډلي تر دې مخکي په خپله لومړۍ لوبه کي د قطر هیواد څخه ۶ ګولونه پر ۰ سخته ماته وخوړه، خو په دوهمه لوبه کي ئې بیا بنګله دېش ته ۱ ګول پر ۰ ماته ورکړه.

د عُمان په وړاندي لوبي ته افغان فوټبال فدراسیون یوه اونۍ مخکي ۲۳ کسیزه لوبډله اعلان کړه، چي پکښي یو شمېر نوو لوبغاړو ته بلنه ورکړل سوې.

افغان فوټبال لوبډله د عُمان په وړاندي لوبي ته د پوره چمتوالي خبر ورکوي.