د افغانستان او پاکستان کريکټ لوبډلو پرتله!

ليکنه: مدثر دعوت

نن ماسپښين ۰۲:۰۰ بجې د افغانستان او پاکستان لوبه ده.

په نړيوال جام کي يوازنۍ افغان لوبډله ده چي هيڅ لوبه يې نده ګټلې او نومرې نلري.

افغان لوبډلي چي وروستۍ لوبي يې ډيري ښې ترسره کړي،خپله هڅه يې کړې خو ندي توانيدلي چي د لوبي په ګټلو بريالي سي.

پاکستان بيا په روان نړيوال جام کي ۲ لوبي ګټلي يوه يې له نيوزلينډ او بله يې له انګلستان څخه ګټلې.

افغانستان په روان نړيوال جام کي ۷ پرلپسې لوبي بايللي.

خو تر نړيوال جام مخکي په تمریناتي لوبه کي افغانستان وکولای سوله چي پاکستان ته ماته ورکړي.

د پاکستان لوبډلمشر ويلي چي د افغانستان په وړاندي ننۍ لوبه کي به دخپل پوره توان څخه کار واخلي همدارنګه افغان لوبډلمشر ګلبدين نائب هم د پوره چمتووالي خبر ورکوي او د راشدخان څخه يې هيلي ډيري دي،پداسی حال کي چي افتاب عالم افغانستان ته راستول سوی او پرځای يې سيدشيرزاد اخيستل سوی.

د دواړو لوبډلو پرتله.

تر دې مهاله پاکستان ۹۲۳ يو ورځنۍ لوبي کړي او افغانستان نن ۱۲۲ لوبه کوي.

افغانستان او پاکستان ۳ ځلي په يو ورځنيو لوبو کي سره مخ سوي، ټولي لوبي پاکستان ګټلي.

يوه لوبه پاکستان په ۲۰۱۳ز کال کي په ۷ ويکټو ګټلې،دويمه لوبه يې په ۲۰۱۴ز کال اسيا کپ کي د ۷۲ منډو په توپير وګټله او دريمه لوبه يې په ۲۰۱۸ز کال اسيا کپ کي په ۳ ويکټو وګټله.

پاکستان په هيډينګلي لوبغالي کي چي نن لوبه ده خپلي تيري ۳ لوبي بايللي.

خو په نړيوال جام کي افغان لوبډلي پرلپسې ۷ لوبي وبايللې، که څه هم تردې وړاندي يې تر ۴ پرلپسې لوبو اضافه نه وې بايللي.

افغانستان په نړيوال جام کي پرلپسې لوبي د ۲۰۱۵ز کال راهيسي بايللي.

محمدعامر په روان نړيوال جام کي په هر ۲۱م توپ يوه ويکټه اخيستې .

نوموړي په ۶ لوبو کي په ۱۷.۸۷ اوسط سره ۱۶ ويکټي اخيستي ،چي يوځل يې په يوه لوبه کي ۵ ويکټي هم اخيستي.

محمدنبي يوازي ۲ ويکټو ته اړتيا لري چي په نړيوال کريکټ کي د دويم افغان لوبغاړي په حيث په ۱۸۹ لوبو کي ۲۰۰ ويکټي پوره کړي.

تر ده وړاندي راشدخان تر دې مهاله په نړيوال کريکټ کي ۲۱۱ ويکټي اخيستي.

بابر اعظم د روان نړيوال جام په ۶ لوبو کي ۳۳۳ منډي کړي چي تر اوسه هيڅ ۲۵ کلن پاکستاني لوبغاړي په يوازي سر دومره منډي ندي کړي.

په ۱۹۸۷ز کال کي سليم ملک چي ۲۴ کلن وو په ۷ لوبو کي يې ۳۲۳ منډي کړي وې.

همدارنګه بابر اعظم په روان کال کي د پاکستان لپاره په يو ورځنيو لوبو کي تر ټولو ډيري ۸۰۵ منډي کړي،۲ سليزي او ۵ نيمه سليزي يې وهلي.

تر ۲۰۱۳ز کال راهيسي هيڅ پاکستانی لوبغاړی پدې ندی توانيدلی چي په يوه کال کي په يو ورځنيو لوبو کي تر ۹۰۰ منډي ورسوي.

د هوا په اړه:

د انګلستان په ليډز ښار کي نن د باران اټکل نسته.

د لوبي په جريان کي به لمر وي او د لوبي د دريدلو لپاره هيڅ چانس نسته.

د پيچ په اړه:

د هيډينګلي لوبغالي پيچ باندي د سريلانکا او انګلستان لوبه هم ترسره سوې.

انګلستان ونسوای کولای چي د سريلانکا د ۲۳۳ منډو هدف ته ځان ورسوي.

د نن توپوهونکو ته به ډيري منډي کول سخت وي، همدارنګه افغان سپينران نن کولای سي نن يوځل بيا خپله وړتيا وښيي.

تيري ۵ لوبو په کتو سره په دې لوبغالي کي ۲۲۷ منډي اوسط هدف دی.

هغه لوبډله چي ټاس ګټي، که توپوهنه وټاکي ښه پريکړه به يې کړې وي.