طالبانو د کابل برېښنا له بېرته نښلولو سره په مشروط ډول هوکړه وکړه

پلخمري (پژواک، ٢٦ ورى ٩٧): د بغلان د برېښنا رياست چارواکي وايي چې د قومي مشرانو په منځګړيتوب له وسله والو طالبانو سره هوکړې ته رسېدلي او ډېر ژر به د کابل د پرې شوې برېښنا د بېرته نښلولو چارې پيل کړي.

دغه څرګندونې د بغلان د برېښنا رييس سلطان احمد عزيزي د وري په ٢٦مه پژواک خبري اژانس ته وکړې.

وسله والو طالبانو وړمه شپه د بغلان ولايت د دوشي ولسوالۍ په دهن لرخاب سيمه کې له ازبکستانه کابل ته د وارداتي برېښنا پايه پر ماينونوالوځولې ده چې له امله يې د کابل ښار په ډېرو سيمو کې برېښنا نشته.

خو د بغلان د برېښنا رييس وايي چې د قومي مشرانو په منځګړيتوب له طالبانو سره هوکړې ته رسېدلي دي.

هغه وايي: ((طالبانو، قومي مشرانو ته ويلي چې د برېښنا رياست کارکوونکي دې راشي، د برېښنا مزي دې وصل کړي، موږ مشکل نه لرو، خو زموږ کليو ته دې هم برېښنا ورکړي.))

طالبانو د سنګ سوراخ، کره ډګه، علي خېل، زهرابي او کمره کليو لپاره د برېښنا غوښتنه کړې ده.

دغو کليو پخوا هم برېښنا نه درلوده خو د برېښنا پايې د يادو سيمو د اوسېدونکو په ځمکو کې لګول شوې دي.

د بغلان د برېښنا رييس وايي چې امنيتي ځواکونه سيمې ته رسېدلي او لږ وروسته به د دوى تخنيکي ډلې هم ورسيږي.

دغه راز د دوشي ولسوالۍ د کیله ګۍ سیمې اوسېدونکي حاجي عزیزالرحمن پژواک ته وویل چې یو شمېر قومي مشرانو د برېښنا شرکت له مسوولینو سره ولیدل او هغوى ورته ويلي چې له سروې وروسته به يو شمېر کليو ته برېښنا ورکړي.

بلخوا د بغلان د امنیې قوماندانۍ ویاند ذبیح الله شجاع پژواک ته وویل چې افغان ځواکونو د برېښنا الوځول شوې پايې څلور خواوې کلابندې کړې دي.

هغه وايي: ((موږ په انتظار کې يو چې د برېښنا شرکت ټېم را ورسېږي او کار شروع کړي.))

د يادو څرګندونو په اړه وسله والو طالبانو تر اوسه څه نه دي ويلي.

دا په داسې حال کې ده چې په تېره يوه مياشت کې دا درېيم ځل دى چې وسله وال طالبان د بغلان په مربوطاتو کې پر کابل د برېښنا مزي پرې کوي.