“زیات فلمونه مې ځکه پریښودل، چې له سړیو يې کمه ګڼلم”

د بالیووډ وتلې ستورې سونم کپور ادعا کړې، چې په بالیووډ کې د فلم هلک ته د فلم د نجلۍ په نسبت ډيرې پیسې ورکول کیږي.
نوموړې زیاتوي، دا څه اوسنۍ خبره نه ده؛ دا کیسه په بالیووډ کې د کلونو راهیسې روانه ده.
سونم ویلي، چې دې خپله ګڼ فلمونه ددې لپاره پریښي، چې د فلم د نارینه اداکار او ددې د پيسو ترمینځ يې انډول نه و ساتلی.
نوموړې زیاتوي: “دا اوس اوس راته د یو فلم د جوړولو وړاندیز وشو. ډيره ورته خوشاله وم؛ خو چې پیسې مې يې ولیدلې، ډیرې بې خونده وې. زنګ مې ورووهلو؛ ومې ویل، دا سپکاوی دی. تاسې ما ته اوس هم د لس کالو پخوا فکر کوئ. تاسې زما نیرجا فلم ولید، چې څومره کامیاب و. ولې مو داسې وکړل؟”
کپور زیاتوي، چې هغوې د فلم هلک ته ډيرې پیسې ورکولې او دې ته يې هومره نه ورکولې.
سونم کپور د بالیوود د وتلي ستوري انیل کپور لور ده. د هغې نیرجا فلم ښه بازار درلود.
په نژدې راتلونکې کې به د رنبیر کپور سره په ګډه د سنجي دت په ژوند جوړیدونکي فلم کې راڅرګنده شي.

په یو بل رپوټ کې سونم کپور رسنۍ تورنې کړي، چې همیشه د نجونو د شخصي ژوند په اړه رپوټونه برابروي، خو د نارینه اداکارانو په اړه څه نه وايي.
نوموړې د رسنیو سره په خبرو کې رسنۍ ګرمې وبللې، چې همیشه د نجونو او د بالیووډ د سرلارو ښځینه اداکارانو د شخصي ژوند په اړه ډير خبرونه خپروي؛ خو نارینه اداکاران يې بیا له یاده ویستلي.
کپور وايي، چې خلک همیشه له دې د واده پوښتنه کوي؛ خو د رنبیر کپور او رنویر سنګ په اړه څوک پوښتنه نه کوي؟
سونم زیاتوي، “زه د شخصي ژوند په اړه هر کله غږیدلای شم، خو زما په ژوند کې یو بل څوک شریک دی، د هغه لپاره نه غږیږم، ځکه هغه ته احترام لرم.”
ویل کیږي، سونم کپور د انند اهجو سره واده کوي، خو دوې ته نژدې سرچینو په دې اړه کومه تبصیره نه ده کړې.

له فیسبوک تبصرې

تبصرې