د کابل ښار د پاکوالي عمومي حشر پيل شو

کابل (پژواک، د تلې لومړۍ نېټه ٩٥): د کابل ښار د پاکوالي په موخه  د دغه ښار په ټولو ناحيو کې عمومي حشر پيل شو، چې ياد حشر به تر راتلونکو لسو ورځو پورې دوام وکړي.

 د کابل ښاروالۍ چارواکي وايي، چې دغه پروګرام د اختر په ورځو کې د ښار د پاک کارۍ او د انبار شوو کثافاتو د لېږد په موخه پيل شوى چې په کې د ښاروالۍ دوه زره کارکوونکي هم شرکت لري.

 د کابل ښاروالۍ د عمومي تنظيف مشر انجنير تواب احمدي وايي، چې په ياد عمومي حشر کې د سل زره ټنه کثافاتو د لېږد په موخه د کابل ښاروالۍ له ١٨٠ زيات موټر او دغه راز د ټولګټو وزارت ٢٠ ډېر بار لېږدونکي موټرونه؛ د کابل ښار د ٢٢ ناحيو په واک کې ورکړل شوي دي.

 د کابل ښاروالۍ ياد چارواکي زياته کړه، چې په تېره مياشت کې د رخصتيو او د خځلو د لېږد موټرونو کموالي له امله د کابل ښار په ډېرى سيمو کې ښځلې او کثافات انبار شوي دي.

 د کابل ښاروالۍ د تنظيف عمومي مشر د دې خبرې په څرګندولو سره چې د کابل ښار د شپږ ميليون نفوس لپاره يواځې ٣٥٠٠ پرسونل او ٣٠٠ موټرونه بسنه نه کوي او زياته يې کړه: "د کابل ښار د پاک کارۍ لپاره ١٥ زره پرسونل او دوه زره موټرونو ته اړتيا ليدل کېږي."

 نوموړي د ښار اوسېدونې فرهنګ د رعايتولو او پاک کارۍ په برخه کې د خلکو رول د پام وړ وباله او زياته يې کړه، ترڅو چې خلک په کارۍ کې ونډه ونه لري، خځلې به ترې پاکې نه شي.

 د تنظيف عمومي مشر د کابل له اوسېدونکو وغوښتل، چې د خپلو کورونو خځلې او کثافات په خپلو ټاکل شوو ځايونو کې واچوي، څو د يادې ادارې کارکوونکي يې ژر تر ژره ولېږدوي

 هغه وويل، چې د تنظيف رياست کارکوونکي هره ورځ د کثافاتو د لېږد لپاره په دريو شفټونو کې خپله دنده ترسره کوي.

د کابل ښاروالۍ د تنظيف رياست يوه کارکوونکي محمدرضا پژواک خبري اژانس ته وويل، پر دې سربېره چې معاشونه يې ډېر کم دي، خو بيا هم په رښتينولۍ سره کار ترسره کوي.