ولسمشر غني: اصلاحاتو او پارلماني ټاکنو ته ژمن یو

کابل (پژواک، ۲۵ چنګاښ ۹۵): ولسمشر وایي، حکومت ټاکنیزو اصلاحاتو له راتلو سره، په آزاده او عادلانه توګه پارلماني او د ولسوالیو شوراګانو ټاکنو ترسره کولو ته ژمن دی.

له ارګ څخه د چنګاښ په ۲۵مه، پژواک خبري اژانس ته په یوه رالیږل شوې خبرپاڼه کې راغلي، چې محمد اشرف غني  د افغانستان لپاره د ملګرو ملتونو سازمان د سرمنشي له ځانګړي استازي ښاغلي تادامیچي یاماموتو سره وکتل.

دغه لیدنه چې په ارګ کې وشوه، د اجرائیه رئیس ډاکټر عبدالله عبدالله سربېره یو شمېر حکومتي مقاماتو او په کابل کې د دوستو هېوادونو سفیرانو هم په  ګډون کړی وو.

په سر کې د هېواد جمهور رئیس د ملګرو ملتونو د سرمنشي ځانګړي استازي او ورسره پلاوي ته ښه راغلاست ووایه او دواړو غاړو د بېلابېلو موضوعاتو تر څنګ د را روانو ټاکنو په ترسره کولو بحث او خبرې وکړې.

د هېواد جمهور رئیس وویل، حکومت ټاکنیزو اصلاحاتو له راتلو سره، په آزاده او عادلانه توګه پارلماني او د ولسوالیو شوراګانو ټاکنو ترسره کولو ته ژمن دی. هغه وویل:  ((موږ به د ملي شورا نقش ته په پوره درناوي ټاکنیز صلاحات تعقیب کړو.))

جمهور رئیس څرګنده کړه، حکومت د ټاکنیزو اصلاحات د قانون په برخه کې د پارلماني ګډې کمیټې تصمیم ته په تمه دی او ټینګار یې وکړ، په نظرونو کې تنوع او د ټولو را ګډول یوه اړتیا ده، ترڅو د ملي شورا غړي په دغه قانون تفصیلي بحث او مباحثه وکړي.

هغه  او اجرائیه رئیس ټینګار وکړ، مخکې له دې چې د ملي شورا غړي د اوړي رخصتیو ته لاړ شي،  ګډه کمیټه کې دې د ټاکنیزو اصلاحاتو قانون تصویب کړي، چې  د اصلاحاتو بهیر له چټکتیا سره مرسته وکړي. 

په دغه، لیدنه کې د ملګرو ملتونو د سرمنشي ځانګړي استازي وویل،  د ټاکنو د ترسره کولو په برخه کې د پرمختګ له امله د ملي وحدت حکومت له هڅو هرکلی کوي.

د ملګرو ملتونو د سرمنشي ځانګړي استازي او په دغه لیدنه کې حاضرو دیپلوماتیکو غړو د ټاکنو د ترسره کولو په برخه کې د حکومت له هڅو ملاتړ څرګند کړ او له حکومته یې وغوښتل چې په دغه برخه کې دې د زماني جدول طرحه تنظیم کړي.

جمهور رئیس د ملګرو ملتونوسازمان د سرمنشي له دوامداره ملاتړه د مننې له څرګندولو سره وویل: ما تر دې مخکې دوه کاري ډلې موظف کړي دي، چې د ټاکنو په امنیتي او مالي برخه کې په تیارو کار وکړي او د ټاکنو د ترسره کېدو لپاره د افغانستان د بودجې څخه ورته ۱۰میلیونه ډالره ځانګړي شوي دي.

جمهور رئیس د ملګرو ملتونو سازمان ځانګړي استازي ته وویل چې ستاسو د دوامداره مرستو هرکلی کوو او هڅه به کوو، وروسته له هغې چې په راتلونکي اونۍ کې پارلمان د ټاکنیزو اصلاحاتو قانون تصویب کړ په چټکۍ مخې ته لاړ شو.

یاماموتو جمهور رئیس ته ډاډ ورکړ وې ویل، ملګري ملتونه چمتو دي چې د افغانستان له حکومت سره د ټاکنو پروسې د تنظم په برخه کې چې مشري او مالکیت به یې افغانانو سره وي مرسته وکړي.

په دغه غونډه کې پریکړه وشوه چې په دغه برخه کې د کاري پرمختګونو او تیاریو د ارزونو په منظور دې غونډې دوام پيدا کړي.

- - , .
.