"ننګرهار کې پنځه پاکستاني طالبان او اووه داعش وسله وال وژل شوي"

جلال اباد(پژواک،۲۰ چنګاښ۹۵): چارواکي وايي، د ننګرهار په اچين او کوټ ولسواليو کې د هوايي او توپچي بريدونو پر مهال پنځه پاکستاني طالبان او اووه داعش وژل شوي او دوه داعش وسله وال  ټپيان دي.

د ننګرهار د امنيې قوماندانۍ وياند سمونمل حضرت حسين مشرقيوال د چنګاښ په ۲۰مه، پژواک خبري اژانس ته وويل، تېره شپه د بهرنيو ځواکونو بې پيلوټه الوتکې د اچين مامندو سيمه کې بريدونه کړي.

مشرقيوال وايي: (( په دې بريدونو کې د څلور بهرنيانو په ګډون پنځه داعش وسله وال وژل شوي دي.))

اخوا بيا د ننګرهار د والي وياند عطاء الله خوږياڼي پژواک ته وويل، په ياد بريدونو کې وژل شوي پنځه وسله وال، پاکستاني طالبان دي.

د والي وياند وايي، په دې بريدونو کې ملکي وګړو ته مرګ ژوبله نه ده اوښتې.

د اچين ولسوالۍ اوسېدونکي نورخان پژواک ته وويل، تېره شپه د مامندو اړوند د باندر او للمې په سيمو کې بې پيلوټه الوتکې بريدونه کړي دي.

د نوموړي په وينا، د دې بريدونو له امله د اوښتو تلفاتو په تړاو معلومات نه لري؛ خو يادونه کوي چې په يادو سيمو کې د داعش وسله والو نفوذ ډېر دی او وخت ناوخته پرې هوايي بريدونه کېږي.

د يوه بل خبر له مخې  چارواکي وايي چې د کوټ ولسوالۍ د لاغرجو په سيمه کې د توپچي بريدونو په ترځ کې  د داعش اووه وسله وال وژل شوي او دوه نور ټپيان دي.

د ۲۰۱ سېلاب قول اردو وياند ډګرمن شيرين اغا فقيري پژواک اژانس ته وويل، د کوټ په ولسوالۍ کې د ګډو ځواکونو د شاهين ۱۸ عملياتو په ترڅ کې د لاغروجو په سيمه کې توپچي بريدونه شوي دي.

فقيري وايي: (( په دې بريدونه کې د داعش اووه وسله وال وژل شوي او دوه ټپيان دي، همدا شان د دوی يوه اندازه وسلې هم له منځه تللې دي.))

د ده په خبره، په کوټ کې دا پيل شوي عمليات بريالي روان دي او ډېر سيمې په کې د وسله والو له نفوذه پاکې شوې دي.

طالب او داعش وسله والو تراوسه په دې تړاو رسنيو ته څه نه دي ويلي.