د ناټو ګډه اعلاميه : افغانستان به يواځې نه پرېښودل کېږي

وارسا (پژواک، ١٩ چنګاښ ٩٥) : د ناټو سازمان د سرمشريزې غونډې لخوا په يوه خپره شوې اعلاميه کې له افغانستان سره د اوږود مهاله امنيتي ، سياسي او اقتصادي همکاريو ژمنې شوې دي.

د پولينډ په پلازمېنه وارسا کې د ناټو د سرمشريزې غونډې په دويمه ورځ د چنګاښ په ١٩مه، د افغانستان په اړه تر ځانګړې غونډې وروسته په ١١ مادو کې دا ګډه اعلاميه خپره شوې ده.

١: د ناټو سازمان غړو او متحد هېوادونو د دولتونو او حکومتونو مشرانو د افغانستان د ملي يووالي حکومت د ولسمشر او اجراييوي رييس سره په ګډه نن ځانګړې غونډه کې وکړه او په افغانستان کې  د اوږود مهاله ثبات او  امنيت راوستلو لپاره ژمنې وشوې.

٢ : موږ په دې غونډه کې د ټولو غړو هېوادونو ، د ناټو د روزنې ماموريت  د افغان ملي ځواکونو د هغو هڅو ستاينه وکړه چې په افغانستان کې د ثبات لپاره هڅه کوي او په دې برخه کې يې خپل سرتېري قربان کړي دي.

٣ : افغانستان په يواځې نه پرېښودل کېږي ، له نړيوالې ټولنې سره په ګډه زموږ موخه داده  چې افغانستان به يو ځل بيا د ترهګرو پر خوندي ځالې نه بدلېږي ، چې زموږ امنيت له ګواښ سره مخامخ کړي . افغانستان به خپل امنيت، حکومتداري، اقتصاد او ټولنيز پرمختګ ته ادامه ورکوي ، د بشري حقوقو، ښځو او ماشومانو حقوق به خوندي کوي.

٤: د وارسا تر سرمشريزې پورې افغانستان د نړيوالې ټولنې په همکارۍ په بېلا بېلو برخو کې لکه، ښوونه او روزنه، عامې روغتيا  ، ديموکراسۍ، بشري حقوقو، ښځو حقوقو، د بيان ازادۍ  او نورو برخو کې پرمختګونه کړي ، خو اوس هم دغه هېواد له ګڼ شمېر ننګونو سره مخامخ دى ، په ګډه سره به له دې ننګونو سره مقابله کوو، څو شته خاليګاوې ډکې  او ترلاسه شوې لاسته راوړنې وساتل  شي. د ټاکنيزو اصلاحاتو، د ښځو پياوړي کولو، د کار زمينې برابرولو او  اقتصادي زمينو  برابرولو په برخو کې بايد ډېر کار وشي، څو له هېواد څخه د خلکو د تېښتې مخه هم ونيسي.

٥ : له جنورۍ ٢٠١٥ زېږديز کال راهيسې چې افغان ملي دفاعي ځواکونو د خپل هېواد ټول امنيتي مسووليت پر غاړه اخيستى، د ناټو د (غوڅ ملاتړ) په نامه د روزنې ماموريت د افغان ځواکونو د روزنې ، مشورې او همکارۍ ماموريت ته ادامه ورکوي ، ناټو او نړيواله ټولنه هڅه کوي  چې افغان ځواکونه ښه روزنه ترلاسه کړي او مجهز شي . افغان ځواکونه په دوامداره توګه د پرمختګ  په حال کې دي او په ميړانې له ننګونو سره مقابله کوي .

٦ :  ناټو او متحدينو يې نن تر ٢٠١٦ کال وروسته هم د روزنې ماموريت ته د ادامې ورکولو پرېکړه وکړه، ددې پرېکړې له مخې، افغان پوځ، ملي پوليس او هوايي ځواکونو ته به په بېلا بېلو برخو کې روزنه ورکول کېږي ، ددې ترڅنګ به ددې ماموريت ارزونو ته هم ادامه ورکوو. موږ به د افغان ځواکونو مالي ملاتړ او له افغان  دولت سره  اوږودمهاله سياسي همکاريو ته  هم ادامه ورکوو.

٧ :  په دې غونډه کې د افغانستان حکومت ژمنه وکړه چې د نړيوالې ټولنې او ناټو په همکارۍ به د افغانستان ملي امنيتي ادارې پياوړې کوي، د امنيتي ادارو د مشرتابه مهارتونه به لوړوي څو دا ثابته شي چې دوى خپل ولس ته د امنيت راوستلو وړتيا لري ، بشري حقوقو ته درناوى ولري او د افغانستان د اساسي او نورو نافذه قوانينو په رڼا کې فعاليت کوي.  افغان لوري دا ژمنه هم وکړه، چې د ناټو د شيکاګو سرمشريزې غونډې له پرېکړو سره سم به خپل عايد له زياتېدو سره  د افغان ملي ځواکونو په مالي برخه کې خپله برخه ډېروي او تر ٢٠٢٤ د بدلون تر لسيزې پورې به ټول مالي مسووليتونه پر غاړه اخلي. دغه راز اصلاحاتو ته به ادامه ورکوي، د فساد جرړې به اوباسي ، احتساب ته به تېزوالى ورکوي او اقتصادي پرمختګ به تېزوي.

اوسنۍ لاسته راوړنې به ساتل کېږي،  په حکومتي ملکي او نظامي ادارو کې د ښځو ونډه زياتوي او د افغانستان ملي عملياتي پلان به تطبيقوي . دغه راز  افغان حکومت به ماشومانو له نظامي ليکو څخه ژغوري او په دې برخه کې د ملګرو ملتونو ټول تړونونه پلي کوي.

٨ : افغانستان  ته د ښه ګاونډي توب اړيکې  او سيمه ييزې همکارۍ اړينې دي موږ د افغانستان په اړه د استانبول دپروسې هرکلى کوو ، با ثباته او پر امنه افغانستان د سيمې په ګټه بولو.

٩ : موږ يو ځل بيا تکرارو  چې د افغانانو پر مشرۍ د افغانانو لخوا داساسي قانون له مخې د سولې د پروسې ملاتړ کوو، چې په کې د بشري حقوقو او ښځو حقوقو ته درناوى شوى وي ، يوه داسې د سولې پروسه چې د افغانستان شخړې ته دپاى ټکى کېږدي.

١٠:  ناټو له نړيوالې ټولنې سره يو ځاى  د افغانستان په اړه په راتلونکې اکتوبر مياشت کې د بروکسل د کنفرانس ملاتړ کوي.

١١ : زموږ دنده پاى ته نه ده رسېدلې، موږ د يو با امنه او با ثباته افغانستان لپاره ژمن او متحد يو .