د کونړ پر درېیو ولسوالیو د طالبانو بریدونه پر شا تمبول شوي

اسعداباد (پژواک، ٢٥ ورى ٩٥): د کونړ امنيه قوماندان وايي چې پر درېيو ولسواليو يې د وسله والو طالبانو ډله ييز بريدونه پر شا تمبولي او مرګ ژوبله یې ور اړولې ده.

د کونړ امنيه قوماندان مل پاسوال عبدالحبيب سيدخېل د وري په ٢٥مه پژواک خبري اژانس ته وويل چې تېره شپه وسله والو طالبانو د دغه ولايت پر مرورې، سرکاڼو او شيګل ولسواليو ډله ييز بريدونه وکړل.

هغه زياته کړه چې په بريدونو کې يو پوليس او يو عام وګړى ټپي شوي، خو د پوليسو په ځوابي بريدونو کې ٩ وسله وال طالبان وژل شوي او شپږ نور ټپيان شوي دي.

دى وايي چې په سيمه کې اوس هم چاڼيز عمليات روان دي.

بلخوا د کونړ د عامې روغتيا سرپرست ډاکتر احسان الله فضلي پژواک اژانس ته وويل چې دوى ته ټپیان شوي دوه سرتېري او درې عام وګړي ور وړل شوي.

هغه د ټپيانو روغتيايي حالت د ډاډ وړ وباله.

طالب وياند ذبيح الله مجاهد وايي چې دوى په يادو بريدونو کې درې پوستې نيولې او پوليسو ته يې درانه زيانونه اړولي دي.

نوموړي د يوه طالب د وژل کېدو او دوو ټپيانو پخلى وکړ.