د سلمان خان د څو فلمونو د پرلپسې ساړه بازار وروسته د هند د سینما دې وتلي لوبغاړې په خپل نوې فلم: ټایګر ژوندی دی ( ټایګر زنده هی) د فلمونو بازار ته ټکان ورکړی.
دا فلم چې د جمعې په ورځ خپور شو، په لومړۍ ورځ یې په هند او نړۍ کې تر ۳۴ کروړو زیاتې پیسې وکړې. د شنبې په ورځ پر باکس افس ددې فلم بازار پنځه دیرش کروړه حساب شوی دی.
د سلمان خان دا فلم چې علي عباس ظفر یې ډایرکټر دی اصلا په ۲۰۱۲ م کال کې د ( ایک تها ټایګر ) فلم بله برخه یا دوام دی. په فلم کې پر سلمان خان سربیره کترینا کیف، انګاد بیدي او نواب شا هم رولونه لوبولي دي.
داسې ښکاري چې په ( ټیوب لایټ) فلم کې د تت کارکولو وروسته سلمان خان په خپل نوې رول ډیر زیار ګاللی دی.
ټیوب لایټ فلم چې د ۲۰۱۷ م کال په لوموړیو کې خپور شو، د سلمان خان د نورو فلمونو په مقایسه یې بازار سوړ و او نوموړې ژمنه کړې وه چې په خپلو راتلونکو فلمونو کې به ددې ماتې جبران کوي.
د فلم د جوړونکیو په وینا د سلمان خان ( ټایګر زنده هی) فلم په لومړی ورځ درې دیرش کروړه هندي روپۍ ګټلي ، دومره پیسې ګټل د هغه فلمونو لپاره چې د رخصتۍ په ورځ نه وي خپاره شوي ریکارډ پیسې دي.
د فلم ډایرکټر علي عباس ظفر د فلم په بریا خوښي څرګنده کړې او د سلمان خان د مینه والو مننه یې کړې.
